兩周一聚：大話小說

這天病人往覆診。
醫生：「你個病無法根治喎。」
病人：「吓？咁我仲有幾耐命？」
醫生：「我唔係話你個病無得醫，只係無法根治，即係治療只可以幫你控制病情，而唔可以好似傷風感冒咁，食完藥過幾日就完全無事一樣，明唔明？」
病人：「哦。咁會唔會好快死？」
醫生：「我答你唔到喎，若果控制得好，咁咪長命啲，否則，好難講。」
病人：「點叫做控制得好？」
醫生：「記住依時食藥，定期覆診，過健康生活，戒煙戒酒，唔好夜瞓，食清淡啲，唔好食太鹹太油嘅嘢，得閒做吓運動就可以。」
病人：「咁我一定好快無命。」
醫生：「點解咁灰呀？其實好多病人都控制得好好，亦好長命，你都得喎。」
病人：「醫生，你唔會明白。」
醫生：「咁你邊方面有困難？」
病人：「我老婆無記性，煮餸成日唔記得落咗鹽未，一係就落完再落，一係就將糖當鹽用，我可以點呢？仲有，佢瞓得少，日哦夜哦，我晚晚都無覺好瞓，趁佢起身去做運動我先至可以瞓番覺。再咁落去，我諗起已經想死。」

Read Full Post »