兩周一聚：五年之後……

某天，大少心情極靚，找這個平日囉囉唆唆的媽媽來聊天。

「媽咪，知唔知五年之後我就十八歲喇？」

「係咩？五年之後？」

大少用力地點點頭，說：「係呀！係咪到時就係成年人？」

「係呀。」

「咁咪要換成人身份證？」

「係呀。」

「咁個兒童身份證呢？係咪會收番？」

「當然啦！一個人唔可以同時擁有兩個身份證。」

「咁咪要再去入境處度排隊換證？」

「係呀。不過可以網上預約。」

「咁係咪要再影過身份證張相？」

「當然囉。唔通你認為五年之後你個樣同依家一樣？」

「其實應該差唔多啫，點解攞親證件都要去影相？」

「因為簽發證件時，要確保你就係相中人，證件中所有資料都係真確，唔係假冒，所以一定要你的近照。」

「哦！咁如果五年之後我個樣無變呢？係咪都要再影過相？」

「傻仔！你兩年前讀五年級時同依家個樣都差好遠，仲講五年之後？梗係要影過啦！」

「咁除咗要換身份證外，仲有咩十八歲可以做？」

「喺我心目中，無咩特別指定要十八歲先至做得，但你既然問到……」

「係乜野呢？」大少閃著期待的目光。

「你都知道五年之後你就十八歲啦，點解你啲思想同行為仲停留喺八歲，可唔可以似番十三歲先，然後至再諗五年之後究竟可以做啲咩？」

「唓！」大少即時鼓起泡腮，說：「媽咪，你兜咁大個圈，原來又係話我似細路，唔同你講。」大少返入房。

看！除了身高外，我無法想像眼前這位小朋友竟然已十三歲，更難想像五年之後，他是一個十八歲的大男孩時，會是什麼模樣。